شاهد.. بدرية طلبة توجه رسالة دعم للسيسي بعد رفع أسعار البنزين
علقت الفنانة بدرية طلبة، علي أزمة رفع أسعار البنزين والتي أقرتها الحكومة أمس، مشددة علي مساندتها للرئيس عبد الفتاح السيسي، في أي قرارات يتخذها.
وكتبت بدرية عبر حسابها بموقع التواصل الاجتماعي فيس بوك، قائلة «ردًا على الأستاذ اللى دخلى على الخاص انت بعت رسالتك بينى وبينك.. لكن حرد عليك قدام كل الناس في النور وفى العلن أنا لا بطبل لحد ولا أصلا بتهز من مخلوق لأنى من الآخر مع ربنا لا رئيس دولة حيفتح لى بيتى ولا حينفعنى يوم الحساب قدام اللى خلقنا».
وأضافت: «كل الحكاية أننا كنا زى الغرقانين المتعلقين في قشاية ورايحين في ستين داهية مع ناس ميعرفوش ربنا وكنا متبهدلين -لا فيه بنزين ولا كهربا كنا بنقف طوابير علشان نحط لتر بنزين وكتير ركنوا عربياتهم علشان مش لاقيين بنزين وساعتها لو كان اللتر بمية جنيه كنا حنشتريه علشان نشوف مصالحنا والنور كان بيتقطع بالساعات ومصالحنا بتتعطل وكنا نتمنى النور ييجى ولو ساعة وندفع فيها دم قلبنا».
وتابعت: «كانت أنبوبه البوتاجاز بــ٤٥جنيه واللا أنتوا نسيتوا واللا يمكن كنتوا عايشين في رخاء وإحنا مش واخدين بالنا دا غير الإرهاب.. ولما جه اللى ينقذنا كلنا اتشعلقنا على كتفه واترمينا في حضنه والحقنا ياجيـــش !!! وكلنا معاك وفعلا كان قد المسئولية وكان قد كلمته وأنقذنا عارف أنقذنا من إيه من إننا كان زمنا دلوقتي في خيم اللاجئين وكان زمانى أنا ومراتك وبنتك وأختك بنخدم في حاجة هما اخترعوها اسمها جهاد النكاح عارفه واللا تحب أشـــــرحلك».
وأوضحت بدرية: «كل المعاناة شوفناها وتحملناها غصب عننا وكنا مذلولين حضرتك بقى عايزنى آجى دلوقتى وأقول على الرئيس اللى شالها خربانة واتحمل كل البهدلة دى وأتهمه ؟؟؟ ياراجل عيب عليك دا حتى المثل بيقول اللى مالوش كبير بيشتريله كبير... وأنا اخترته كبيـــرى أهينه ليه لأسباب ملهوش دخل بيها ؟؟؟؟؟ أهينه ليه وهو بيعمل المستحيـــل علشانا؟؟؟؟ هو أنتوا ليه محسسنى أنه بيكوش وبيحط في خزنة بيتـــه».
واختتمت: «كل واحد حر في اختياره وفى رأيه.. مانا ساكتة علشان اللى بيستظرفوا وبيقلوا في أدبهم اللى مفكرنا بناكل في أتة محلولة ومش حاسين بالناس !!! لا ياحبيبى أنا زيي زي كل الناس بالظبط أنا الحمدلله قعدة في بيتى لا روحت صيفت في مالديف ولا اليونان ولا إيطاليا!! أنا بنت بلد وحاسة بالغلابة قوى علشان محدش بس يصطاد في المية العكرة... ومن الآخر طالما اخترته لازم أفضل معاه ومع دماغه للآخر وبردو أنا حرة.. أنا عن نفسى حستحمل وآجى على نفسى علشان البلد يتصلح حالها وواثقة في دماغه لأن من الآخر اللى يقدر يعمل كده مع الإخوان ويعيشنا في أمان بعيد عنهم أنا أثق فيه لكن ممكن ميجيش على هواكم ولا على دماغكم اللى لسه عايزنها إسلامية متطرفة مش كده واللا إيه وبقول للى مش عاجبه كلامى يحذفنى.. ياريت شوية ديمقراطية وكل واحد حر في رأيه علشان نعرف نعيش...».
