العلام حلو..
الاسم: الحسن مصطفي
السن: ٣٠
المهنه: مواطن
اسمحولي ابدأ بالجمله دي
امي.... السيدات والسادة
قبل البداية في اي موضوع احب اشكر كل القائمين على هذا الموقع وهذه الجريدة بداية من عم مرزوق حارس العقار حتى رئيس مجلس الادارة.
ممكن نتكلم النهارده في الموضوع الاهم في مصر وهو موضوع التعليم.
التعليم يا إخونا، التعليم يا دكاترة، التعليم يا اساتذة، التعليم يا حكومة، التعليم يا ريس.
زمان وانا صغير كان ابويا بيقولي كلمة كدا للاسف هي بتوصف حالنا دلوقت (العلم يرفع بيوت لا عماد لها والجهل يهدم بيوت العز والكرم).
للاسف فعلا بيت العز والكرم اللي هي مصر الجهل هدها ورفع بيوت الجهل.
محتاجين نظرة للتعليم وطبعا اساس منظومة التعليم هو المعلم طب احنا عشان نظبط التعليم والمعلم هنعمل ايه؟!
يؤسفني و(اسمحولي اقول يؤسفني وسط الكلام) ان النظام التعليمي في مصر فاشل جدا احنا بيتخرج كل سنة ناس المفروض انها مؤهلات عليا وللأسف انهم اشباه متعلمين والادهي كمان ان سوق العمل مش محتاج حتى ربعهم ده غير التعليم الفني اللي هو تقريبا اميين ومعاهم شهادة بأنهم اميين اصلا مع ان التعليم الفني ده المفروض انه بيطلعلنا صنايعية والناس الحرفيين اللي السوق محتاجهم والناس تشتغل وتكسب وميبقاش في بطالة.
هحكي كدا علي نموذج حي لثلاثة شباب زي الورد عندنا في قريه كدا في الصعيد.
الاول دا خدها من قصيرها وتسرب اصلا من التعليم.
الثاني كان جايب مجموع يدخل ثانوي عام مرضيش وقال انا هدخل صنايع قسم تكييف.
الثالث بقي دخل كلية دار علوم.
نيجي للأول ده اشتغل وحوش قرشين وفتح محل فرارجي وشغال وراجل كسيب والحياة ماشية معاه كويس.
نيجي بقى للتاني خلص صنايع قسم تكييف واتعلم الصنعة وشغال في شركة تكييف والدنيا معاه حلوة.
نيجي بقى للتالت خريج دار علوم ودا في رأيي الشخصي الخيبة التقيلة بتاعتهم البيه طبعا اتخرج بتقدير مقبول وعامل بيه في قلب البلد وطبعا مستعيب يشتغل في الارض ولا طبعا بيشتغل صنعة مع انه قبل ما ياخد المؤهل كان بيشتغل في الارض وبياخد يومية وبيساعد ايوه دلوقتي بقى عالة على ابوه وعلى المجتمع وطبعا بياخد لحد دلوقتي مصروفه من ابوه وقاعد لا شغلة ولا مشغلة.
عمليا كده الاتنين اللي يعتبر مكملوش تعليم هما اللي نجحوا في الحياة واللي كمل تعليمه هو اللي فشل.
علي فكره دي مش دعوة للتسرب من التعليم استنوا كدا عشان نفهم مع بعض انا قصدي ايه.
انا قصدي اننا نخلي التعليم مجاني واجباري والزامي للمرحلة الاعدادية.
نيجي بعد كدا اللي جايب من 90% فما فوق دا يدخل ثانوي عام.
اللي جايب من 75% لـ 89% ده يدخل ثانوي فني وعلى حسب احتياج المصانع في المنطقة ونبدأ نحدد الاعداد ويبقاله تنسيق كمان.
اللي جايب من 50% لـ 74% دا يدخل ثانوي زراعي وطبعا كل مصر فيها اراضي زراعية.
طيب واحد جايب 75% وهيدخل ثانوي صناعي وعاوز يدخل ثانوي عنيا يا باشا ادخل بس ادفع وهتدفع مش كلام فاضي لا هتدفع قيمة مصاريف 2 من اللي جايبين مجموع يدخلهم ثانوي ومش موضوع تدفع وبس لا كمان ليه تنسيق وفي عدد اماكن معينة مسموح بيها عشان ميجيش يزاحم اللي تعب وشقي عشان خاطر بابا معاه فلوس.
طب لو من الزراعي وعاوز يطلع للصناعي نفس النظام برضو طب لو للثانوي العام يبقي هيدفع مصاريف اربعة وانا قصدي بمصاريف الاربعة او الاتنين دي تكلفة الطالب ده على الحكومة كاملة والغي حاجة اسمها تعليم خاص
نيجي بقى للجامعة االعدد اللي داخل الجامعة هيبقي قليل ودا طبعا هيخرجلنا عدد قليل وبرضو هيبقى فيه عدد بمصاريف مش مجاني وبنسبة معينة وبرضو ليه تنسيق وبرضو الغي التعليم الخاص وبكدا بخرج العدد اللي السوق محتاجه ويبقى كده قضيت على مشكلة البطالة وفي نفس الوقت ارتقيت بمستوى التعليم ومخرجتش اعداد مالهاش لازمة والدولة صرفت عليهم قد كدا وفي الآخر يقعدوا على القهوة ولا الدولة استفادت ولا هما استفادوا.
في الآخر دا مجرد رأي واقتراح ممكن يعجب ناس وميعجبش ناس اكتر نتفق او نختلف مش مشكلة لكن هدفنا واحد هو ان بلدنا يرتقي ويتقدم.
