إلى روح شهداءنا.. «محمد حميدة» يكتب «حدودها ركن م الأركان»

لكل روح اتزفت أو لسه هتتزف..
ما انيش أول شهيد في الصف
ولا آخر شهيد يتزف
أنا وقت إن يهبوا عداك
بشيل روحي فداك ع الكف
..
ما أنيش أول شهيد كبر
ومات ع الأرض ما يبيعهاش
فداها الروح عشان تكبر
وباب الجنة مش ببلاش
...
في آخر لحظة كان واقف
بيقرا رساله من أمه
" انا قلبي عليك قلقان"
وصوت الدفعة بينادي
ولاد الكلب بيهلوا
في اخر صرخة بيكبر
انا دمي يا مصر فداك
...
ما انيش أول شهيد يحضن
تراب الأرض لحظة موت
صحيح الجتة بتفارق
لكن يحيا ف ولادها الصوت
عيال الارض ما تفرطش
ولا موتها يسيب تأثير
عيال الطمي بيشبوا
و بيشيبوا بدون تغيير
عيال الضي بينادوا
أنا دمي اللي وضى الأرض
وحنى الجتة في الاكفان
حماها كالصلاة والفرض
حدودها ركن م الأركان